對於一個平凡人，能夠上到報紙之餘，仲得到蘋果日報幫我整個專題，我萬分榮幸。
仲記得我寫咗《失蹤》個故事之後，網絡爆紅，人人討論，特別係有人行山出事就自然有人聯想起「結界」同諗起我。
當時蘋果日報就搵我想做一個專題，我嗰刻係想拒絕，始終我只係想寫下故仔，亦怕報導手法或內容令我陷入危機。當時係一個總編輯搵我，佢理解我嘅擔憂同疑慮，佢就同我講：
「只要你唔想出鏡，我地一定唔會影住你，我真心鐘意你寫嘅故事，亦真心想你寫嘅嘢多人識。」
最後我帶住戰戰競競嘅心情做訪問，過程亦順利，記者亦好客氣對我，完咗之後，佢同我講：
「今次反應超級好呀！加埋過百萬views！」
見佢咁開心，我亦都放心哂。
我想像唔到香港有一日會無蘋果日報
呢種無力感一啲都唔好受
但大家點都要撐住……
因為每一日香港嘅事情往往令你情緒受到好大波動
其中一個諷刺嘅位
當年《失蹤》呢本書賣到斷市，今日再一次有得買
但蘋果日報過埋聽日就真正「斷市」……
其實過去應該無咩人知，我成日上蘋果，一次係六四，一次係紅雨
但每次都係「網民」孔明，而今次係第一次，亦都係最後一次，我係「網絡作家」孔明。
再次感謝蘋果日報。
失蹤結界專題－孔明
https://www.youtube.com/watch?v=pq0k-GPqWsc&t=3s
Search